Salam untuk torang samua ! ??
Sudara-sudara yang Tuhan Yesus sayang,
Torang samua tau, jaman skarang ini torang hidup deng barang-barang teknologi yang so berkembang, terutama yang torang bahas ini tentang dunia internet. Biar yang torang biking cuma hal yang kacil saja, tapi itu ada dia pe pengaru untuk torang pe hidup deng orang-orang yang ada di sekitar torang.
Tapi...
APA itu dia pe PENGARU BAE ka TARADA ?
Torang tara sadar, torang so pake internet tara iko cara yang butul. Ada banya waktu yang torang buang, cuma untuk hal-hal yang tarada dia pe guna saja. Torang pe maksud, torang sebagai Tuhan pe ana-ana, torang musti pake internet deng butul.
Karna itu, torang sebagai tim Penerjemah Alkitab bahasa Melayu Melaku Utara punya keinginan untuk biking halaman internet dalam torang pe bahasa, supaya torang orang-orang Melayu Maluku Utara yang ada di mana saja, bole kanal pa Tuhan Yesus deng mau peduli pa apa-apa yang ada di sekitar torang. Kong biar itu ana kacil atau orang dewasa, orang-orang skola deng orang-orang yang tara skola, orang-orang yang ada di kota deng orang-orang yang ada di kampong, bole mangarti deng jelas, Tuhan itu paling bae, deng Dia paling sayang pa torang, deng Dia tara perna kase tinggal pa torang, asal torang iko apa Dia pe mau.
Deng kalu torang rasa torang talalu banya biking dosa deng tara pantas untuk Tuhan, torang inga apa yang Tuhan Yesus bilang di kitab Markus 2:17, bagini: “Bukang orang sehat yang perlu dokter, tapi orang saki. Itu dia pe arti, Kita datang bukang untuk pangge pa orang yang anggap dong pe diri butul, tapi Kita datang untuk pangge pa orang yang berdosa supaya dorang bertobat.”
Karna itu, jang torang turus-turus hidup deng rasa bersala, karna kalu torang bagitu, torang pe hidup tara akan beruba jadi lebe bae, tapi akan jadi ancor tara arti apa-apa. Jadi, torang musti pikir apa yang bae untuk torang. Serakan torang pe hidup pa Tuhan, la kase biar Tuhan yang akan bakarja dalam torang pe hidup.
Slamat babaca Tuhan pe Firman dalam torang pe bahasa, torang pasti dapa berkat. Amin. :)
